Lub Hom Phiaj​
Reunion
​​Txij hnub Yaj Xab (Nyiaj Tsu Yaj) tau tso kwv tij Hmoob Sawv Daws tseg. Ua rau peb tawg ua lawm ntau pab ntau pawg. Tus yuav hais li cas los muaj, tus yuav coj li cas los muaj. Ua rau peb ib tse neeg kiag los tij tsis mloog kwv hais, kwv los tsis mloog tij qhia li lawm. Muaj lawm coob leej coob tus tseem xav los mus ua tus coj, koj taus koj hais tau lawm ib pab, kuv taus kuv muaj lawm ib pawg. Ua rau peb cov kwv tij Hmoob sawv daws tsis nco txog peb niam peb txiv, peb pog peb yawg txoj kev sib hlub sib pab yav tag los li lawm. Tus laus tsuj tus hluas, tus ntshe tsuj tus ruam, tus muaj tsuj tus pluag. Ua rau peb ib co kwv tij Hmoob yuav hais los hais tsis tau, quaj los tsis los kua muag. Tsis muaj lawm ib tug txheeb ib tug ze nyob qhov twg uas yuav mus piav tau ib los pub rau mloog. Tsis muaj lawm ib tug kwv tij twg uas yuav mus sab laj qhia tau ib los rau mloog seb puas yuav daws tau txoj kev lwj siab ntsim plawv li lawm. Yog li no Hnub no, peb yog cov tub, cov kiv, cov xeeb leej xeeb ntxwv, cov kwv cov tij uas txom nyem, tsis muaj pab muaj pawg, tsis txawj tsis ntse. Thov nqua hu ib tsoom Hmoob uas nej tsis muaj kwv muaj tij ib yam li peb sawv daws. Thov kom nej thiab peb los mus sib tuav tes ua ke, sib puag xub pwg, los mus ua kwv ua tij, los mus ua neej ua tsav noj sib hlub haus sib ce. Seb puas yuav muaj lawm ib hnub twg peb puas yuav taug tau lawm peb tus coj Yaj Xab (Nyiaj Tsu Yaj) txoj kab txoj lw thiab tus npau suav uas nws hlub peb haiv neeg hmoob.