​Keeb Kwml

​

        nyob rau lub teb chaws los tsuas xyoo 1962.  Yawg hlob General Vang Pao thiab tus mes kas dawb hau, tau sib tuav tes, cog lus ua phooj ywg thiab tiv kob rog nyab laj Liab.  Kob rog zaum no yog tiv thaiv tus Nyab Laj Liab uas yuav siv daim av nplog tuaj mus tua Nyab Laj qab teb thiab AsMes Lis Kas cov tub rog.  Pib txij li thaum tau tuav tes koom nrog tus Mes Kas daj hau lawm, yawg hlob General Vang Pao thiaj li tau coj peb cov me nyuam Hmoob mus ua kob tsov rog  no.  Los txog rau thaum lub xyoo 1972, lub teb chaws nplog thiaj li tau poob rau Nyab Laj thiab Nplog liab tes.  Ib tsoom Hmoob sawv daws thiaj li tau nrhiav kev tawm tuaj mus nyob rau sab Thaib Teb lub xoom Noom Qhais thiab Npab VibNais.  Thaum sawv daws tau tshem los mus txog rau lub zos Ban Vinai.  Ib tsoom Hmoob sawv daws thiaj li tau tsa muaj ib tug coj uas yuav los tuav haiv neeg Hmoob kom nyob ruaj nreg thiab nyab xeeb.  Sawv daws thiaj li tau pom zoo tsim kom muaj lub Koos Haum "Hmong SamNeua HouaPham" uas muaj tus thawj yog " Yaj Xab (Nyiaj Tsu Yaj)" ua tus thawj coj haiv neeg Hmong.  Pib txij li thaum tsim muaj lub koos haum no los mus.  Peb Hmoob sawv daws muaj kev sib pab sib hlub heev.  Tsis hais yuav muaj plaub muaj ntug los tus thawj coj Yaj Xab (Nyiaj Tsu Yaj) tau pab sawv daws, kho thiab daws sawv daws tej teeb meem kom ob tog zoo siab.  Nkawm niam txiv txij nkawm twg tsis sib haum los nws yeej kho kom ob leeg txawj los mus sib hlub li qub.   Pab kwv tij twg tsis sib raug zoo los nws yeej muaj lub peev xwm yuav kho kom sawv daws txawj los mus sib yoog thiab sib hais kom tsev neeg ntawv muaj txoj kev sib haum tuaj.  Lub koos haum Hmong SamNeua HouaPham no, tsis yog tsim los pab neeg xwb tseem tsim los pab peb ib tsoom kwv tij Hmoob uas poob rau sab ntuj tim nplog.  Lub koos haum no tseem xa neeg mus tiv thaiv thiab rhuav tshem cov Nyab Laj thiab Nplog liab kom cov kwv tij Hmoob nyob rau nplog teb thiaj li tau txoj kev tuaj rau sab teb chaws Thaib.  Muaj coob tug kwv tij Hmoob uas twb tuaj txog rau sab Thaib teb lawm los nws tseem muab nws roj nws ntshav rov mus pua kev rau ib tsoom Hmoob sawv daws kom tau tuaj rau sab Thaib teb.  Txij li hnub ntawd los mus thiaj li pib muaj Caub Fab, Koos Paj Cai thiab tub rog nyob rau pem Nas Hiab thiab ciam teb Nplog thiab Thaib.  Lub Hom phiaj uas loj tshaj plaws ntawm lub koos haum no yog, xav kom peb ib tsoom Hmoob kwv tij neej tsa sawv daws rov tau mus nyob rau sawv daws tej qub teb qub chaw.  Mus ua noj ua haus rau sawv daws tej qub teb.  Tau mus cog nplej cog pob kws thiab cog dib cog taub rau tej ntav toj.  Yuav hnov lawm me nas me noog quaj los mus kho siab zim.  Yuav hnov sawv daws tej me nyuj me nees ua tswb nyuj tswb nees nrov kho siab zim nram tej kwj ha.  Tab sis vim yog peb haiv neeg Hmong txom txom nyem, nyiaj txiag los tsis muaj, txuj ci dab tsi los peb sawv daws tsis paub.  Peb Hmoob tsuas siv tau lawm peb lub dag lub zog mus tiv thiab mus ua xwb.  Thaum kawg peb thiaj li rov swb dua zaum ob.  Lub zos Ban Vinai thiaj li raug kaw thiab sawv daws thiaj li tau raug tshem mus nyob rau ChiengKham, Nas phos thiab Phab nab nib khoos.  Yaj xab ( Nyiaj Tsu Yaj ) thiab nws tsev neeg thiaj li tau raug xa tuaj rau lub teb chaws USA no xyoo 1992.  Yaj Xab (Nyiaj Tsu Yaj) txoj hmoo tsis muaj nws tau ib tug mob tsis zoo thiaj li ua rau nws tau tso ib tsoom Hmoob kwv tij neej tsa sawv daws tseg rau xyoo 1999 lawm.  Kev ncaim mus zaum no ua rau peb haiv neeg Hmoob uas tau paub nws thiab tau nrog nws ua hauj lwm ua ke 20 lub xyoo dhau los tau tu siab loj tshaj plaws.  Txij hnub Yaj Xab (Nyiaj Tsu Yaj) tau tso sawv daws tseg lub koos haum "Hmong SamNeua HouaPham" thiaj li tau ploj nrog nws mus lawm."